
گل و گلشن همیشه فصل بهاران ایستر
بلبل شیدا همان صحن گلستان ایستر
گل و گلزار و چمن، گلشن و دشت و دمن
گلشنه جلوه وئره مرغ خوش الحان ایستر
بو روش واردی طبیعتده دوباره دئریله
بو دئریلماقلقا قیش فصلینه پایان ایستر
گؤوره یئردن علف، گل لر آچا رنگارنگ
معتدل آب و هوا، شبنم و باران ایستر
سیره چیخماقلقا آهوی ختن فصل بهار
دگمیه تیر خطا امن بیابان ایستر
مرغ آزادی رها اولماقیلان وار هوسی
بال و پر باز ایلیوب دهرده جولان ایستر
یارینی گورماق اوچون عاشق دلخسته و زار
دلنشین صحبت اوچون محفل یاران ایستر
گلشنون گل لرینه آب هوا خاکیله نور
ره بره گل بئجره گلشنه باغبان ایستر
گلشن انقلابا چوخلی اساس لازمه دور
نور وئره گل لرینه خورشید تابان ایستر
بارور اولماقا پژمرده نهال دین اوچون
لاله تک آچماقا گل سو یئرینه قان ایستر
خلقی ارشاد ائلیه ناطق حق حق یولونا
حق سؤزون سویلماقا عالم و عرفان ایستر
حقی باطل دن آییرماز مگر او اهل فنون
حقی ثابت ائلیه منطق و برهان ایستر
چوخلاری دلده اولور حامی مستضعف و دین
لیک عمل ایلماقا بیر دل سوزان ایستر
گئتمه هر سوز دینین سمتینه ای دوست عزیز
هر سؤزه عاقل اولان حجت و عنوان ایستر
عاشق دین خدا حامی مستضعف اولان
هرزادونان چکوب ال جانینی قربان ایستر
شهیدین قانینه قیمت وئره جاق صاحب قان
ارزش خاتم اوچون لعل بدخشان ایستر
هر تراب اوسته شهید قانینی جاری ائلمز
کربلا دشتی تکین خاک خوزستان ایستر
کشتی انقلابی ساحل امیده چکه
نوح وار روح خدا پیر جماران ایستر
نمرودون جانینه وحشت سالا تا دوست خدا
سیل تک میغ مینادان لشکر یزدان ایستر
بتلری کعبه آلله ده صد پاره ائده
بت شکن شیر خدا ختم رسولان ایستر
ظلم فرعون دان آزاد ائلیه بنده لری
مرد حق تابع دین موسی عمران ایستر
مصرده پادشهی خوابیدن آزاد ائلیه
یوخوسون تعبیر ائدن یوسف کنعان ایستر
انقلاب پیروز اولا حکم قرآن اجرا اولا
چولقویا دین مبین چوخلی شهیدان ایستر
صدام و ریگانی محو ایلماقا منطقه ده
قدسی آزاد ایلماق همت مردان ایستر
شب تاریک ده بیر جاده پر شیب و فراز
رهنما اولماق اوچون شمع فروزان ایستر
انقلاب جاده سینه تیره شب ظلمانی
شمع تک روشن اولان خون جوانان ایستر
مكتب حقی جهان ایچره پیاده ائلماق
دینه پابند اولوب قدرت ایمان ایستر
دینی حفظ ایلماقا دست اجانبدن عمو
عامل حکم خدا بوذر و سلمان ایستر
دؤزه هر مشکله هر زحمته عالمده بوگون
مال و جان دینه وئره مرد مسلمان ایستر
ایستياق عدل و صفا عالمی یکسر بورویه
پیرو مکتب دین وحدت قرآن ایستر
یرتجی قوردون النین قوزونی ساخلاماقا
بیر رشادتلی قوی هوشلی نگهبان ایستر
گرگ درنده گزر طعمه دالونجا دولانار
صیدی چون غافل اولا دشتینی دومان ایستر
شب تاریک ده ائو صاحبینین یاتماقونی
دستبرد ورماق اوچون سارق و دزدان ایستر
توطنه چیده ائدیر قوم منافق همیشه
خنثی ائدماق اوچون منطق قرآن ایستر
ظلملن بر پا اولان کاخ ستمگر اوچون
عدل اسلام اونی دهر ده ویران ایستر
برج طاغوتیانی ریشه کن ادماقدان اوتور
سیل تک جاری اولان اشک یتیمان ایستر
جان نثار ایلماقا دین خدانون یولونا
حامی دین خدا ملت ایران ایستر
سلطه گر سلطه سینی عرصه ده سندرماق اوچون
خشم ملت یارادان بادیله طوفان ایستر
سرطان غده سینی کسماق اوچون منطقه ده
کوره دینی گؤرن خنجر بران ایستر
هامونی بنده ادیب دوزخ یزدانه چکه
اهل نار ایلماقا امتی شیطان ایستر
سوسیالیس مکتبونون فکری بودی تا خوش اولا
عیش و نوش ایلماقا مسکنین نان ایستر
مکتب ختم رسل سؤیلیری هر آن بو سؤزی
جامعه خوش یاشاسون عدلینن احسان ایستر
منحرف اولمویاجاق تابع قرآن خدا
رستگار اولماق اوچون خالق سبحان ایستر
رستگار اولمویاجاق تابع شیطان رجیم
هدف دین خدا متقی انسان ایستر
حب دنیانی آتار عقلی اولا بو بشرون
ترک دوزخ ائلیوب جنت و رضوان ایستر
خوش او شخسون حالينا صبر و تحمل ائلدی
صابر اولماقلقلان خواری دونان ایستر
آچمویا شکوه دلین رب جلیل درگهنه
استوار اولماقنا عهدیه پیمان ایستر
مرده نی دیرتماقدان اوتور روح خدا
دم وؤرا همچو مسیح قدرت رحمان ایستر
سن خیال ایلمه که حکم خدا اجرا اولور
اجرا اولماقلوقونا حجت یزدان ایستر
اعلمی درگه حقه چؤوروب قاره اؤزون
طلب مغفرت و رحمت و غفران ایستر