
من خوشم دنیانی ترک ایلمیش آسان گدیرم
غملری بوشلاموشام با دل شادان گدیرم
من ره عشقه گدیب مطلبمی آلدوم اله
عشقیم اوسته همیشه در ره قرآن گدیرم
حکم قرآنه عمل ایلمیشم در ره دین
من به امید خدا رحمت یزدان گدیرم
بو تکانلوق چولوی من ترک ایلدوم با دل زار
با دل خرم و شاد سوی گلستان گدیرم
عشق درسین من حسین شاه شهیدانان آلوب
من سعادت یولونی در ره جانان گدیرم
دنیانون درد و غمی سالدی ایاقدان منی چوخ
زندانی ترک ایلیوب با لب خندان گدیرم
دوسلاری ترک ایلماق بس که چتین درد اولوری
دوسلاری ترک ایلیوب دیده گریان گدیرم
بو جهان بنده چکیب بس که منی غافل ادیب
بنددن آزاد اولوب با رخ رخشان گدیرم
گلستاندا گول آچار وقت خزان گلده سولار
بهاروم اولدی منیم گل کیمی خندان گدیرم
قویمادی نفس منی مردمه چوخ خدمت ادم
اودی علت دها من چوخدا پشیمان گدیرم
ناروا ایشلره من دنیادا چوخ صبر ایلدیم
چوخ فشار وردی منه بس که بو دوران گدیرم
پیرو ختم نبی شیعه مولا علیّم
تابع حکم قرآن عاشق رضوان گدیرم
دعوت حقی قبول ایلمیشم با دل خوش
مرگه لبیک دیوب آللها مهمان گدیرم
شیطانون نقشه لری قویمادی مغزیمده اثر
دائما لعن دییوب من سنه شیطان گدیرم
مکتب دینن آلوب اعلمی چون درس دینی
اودی من قبر اوینه صاحب ایمان گدیرم