
کافرهیل
کان کهن کۊهیل لهشێگ ههڵکهنن
گ ڕووژێگ
له ناونکی خهێاڵ و ماچ،
پڕ له مهخش چهوهیل هزار نیهزانم بۊ
ته ههێمان وه بوورهو
چهو داچهقنید و
هناس پیچید و چهو ڕواکنید و
گوڕ سێوڵ دهید و
منهی کهلیمهیل عاشقانه
له گیرفان چهوهیل ڕیارهیل وهر سوو کهید؟
***
کی ههڵسێ لهێ لهش جارانێه؟!
جامێگ له جوغرافیاێ گیان و
لهپاڵێگ نان
له کیسهێ خهلیفهێ خهوف
دانه باڵ مهلهوهرێگ و
کتاوێگ
هاوار ڕفت ڕێژ گیس خوهراوا کهید
داس تفت درو له مکوڵ وساس!
هسارهیل،
هشارهیل شارهیل ویل شهوارن
شهوسوارن
لهش،
پر له تام تهم تیهل تابووتهیله
هاز، پهلامار تاشێگ بهێ
تا بووده براێ هاوپشتێ
تاش، سجیل کلیل درانهیل ئهزرهته
تاش براێ هاوپشت بهرۊ
له وهر داوان دهێ و دلیمهس
وڵام له ههڵهتهیل،
تهنیا بهڕۊێگ
له وهر سوو
هناسێگ گرتێهسهدهسهو
کیشێ! کیشێ!
ههم جهور و سهور
ههم بهور و تهور...
بهڕۊ له وهرسوو مێژوو
ریشێ کوتاسه ناو کتاوێگ
گ ناسنامهێ تیهڵ وهیلانیه
بهڕۊ ناسنامهێ باوان سانه
ناسنامهێ داون ئاوه
ناسنامهێ واران و ئهوره
تام تفت لهشِ لهش نییهێ
***
کی ههڵسێ لهێ لهش جارانێه؟
گردهکانێگ
له گیرفان رووژ، خوهێ خسهو خوار
ئاێهم سهر ئاسنینێگ
له شکیانهیل وهیل پێا بۊ
کهفته سهر چواردهریان ژانانا
ت وهو چهو کهو کاڵهو
ههێمان داوان داوان
له ڕووژ ونجید و
دهسخهڕهت تافهیل وهیل ئێواره کهید؟!
شار له مهلۊچگهیل سهور خودا خالییه و
خهێاوان نۊن سۊن پیاێێگ بهێد
گ له دریژای فریشتهێ گیژێگ
منهی چهپاڵێگ هاز و زهیتوون کهێد
زهیتوون برای هاو پیشت بهرۊ بۊ
داڵهیل سیهێ سهرد
وهیلێ کردن و
چووڵ بڕی بیاوان وه جی
زهیتوون یادگار لهش ئازاێ شارێگه
له وڵات ساتهیل تیهڵ
له دهلیاێ تێژێگ نیقهڵتووز
له فریشتهیل پا پهتی
له لهش ئازاێ ئمروو گیژ
ئمروو دروو؛
ئمروو داغ؛
ئمروو سهرد !
***
کی ههڵسێ لهێ لهش جارانێه؟
ساڵهیل،
پڕ له کوڵووخ خیچگ هازن
هاز له باوان داسهیل ئاشوور هێز گرتیه
وڵام کهتیبهێ بیستۊن
چهنی چهن ساڵه هاوار دووسی کهێد
داسهیل نیمهرو
داسهیل بی مدو
داسهیل تیهڵ
داسهیل بێ بانان
ئهنار خۊنی لهش ئافرهتهیل،
سیف قرمز داوان دار،
گول گول گهنم له هاوش شاێرێگ ،
له وهرسوو واران و هاوش و ماچ، لهت لهتهو کهن!
***
کی ههڵسێ لهێ لهش جارانێه؟
کهوشهیل شهکهت
ههر شهوهکیان
منهی پیایێگ کهن
گ له ژێر ساق قسیهێ تیهریکێگ
منهی گوپێگ رووژنای کهێد!
بهرۊهیل ئێواره
له شان بێ وچان زاگروس
وه ڕزارهو چهوهرێ ئهورێگن
گ له لیوان سوو سهره ورێژه
بهێداخ پیاییگ
له وهرداوان شهوق
ئهو واران چڕی
پیایێگ
تهک داسه ئێوارهیل بی دهسڵاتهو
تا گهر واران
داران دریژ ئاسووهیل خهیاڵێ ئاوێاری بکهێد
له ناو رووژنامهیل بانان
بهرۊهیل تامازروو
ئهول پیایێگا
دهسهونجی نیشتۊن
منهی شهقارتهێ ئومێد کردن
له ناو ڕووژنامهیل بانان...
****
یهکێگ له لهش جارانێ ههڵسا
تام تنگسهیل قسیهیل سهراوهنۊن دا
بهێداخ له بان لهش کهلیمهێگ کوتا
{ئیمهیلیگ
دا له دهر ماڵ خهیال خهیاوانیگ و وهت :
له مزوپتامییا
مهلۊچگیگ خوهێ تاسانیه }
م ههێمان مهی لهشێگ کهم
گ تام تهرم تماشایل لهیرهوهرینێگ دهی
گ پیاێ سیارێگ
له کوچهیل ئاتن
ئرای فریشتهیل خودا حهراج کردۊد ...
لهش! لهش! لهش!
تا سوو لهش کیشن
له ناو خهیاوانهیل دووڵ کهپووڵ شایر وهیلێگ
که کهپووڵێ
چهن هزارهس له کیسێ چێه
****
کی ههڵسێ لهێ لهش جارانێه؟
باخهیل تهنیا
چوو هزار لقێگ
وهرهو خودا دریژا کردنهو
هناس ههڵکیشن
سمنت دروو
ڕێ ههناس خهیاوانهیل وهیل گرتیه
سان تیهت ژان
له شان سقانهیل ساتێگ
له کلیساێگ له ڕووم
خراو ههڵوژنی
م ههڵمان
له بان جادهگان تیهڵ «چله»
منهی کهلیمهیل کهل کهم
تا گهر مالیگ
له خهیاڵ چهوهیلد ههڵچنم
کی زانێ
شاهات تنیش ههڵساید
لهێ لهش سلۊکه
لهێ لهش پۊکه
لهێ لهش هۊچه
لهێ لهش تاتیله
****
کی ههڵسێ لهێ لهش جارانێه؟
داوڵ
تامازروو گوپێگ ئاوه
له ناو دهیشتهێ تاوسان وسان خهیاڵ مناڵێگ
زانایل ئۊشن:
داوڵهیل ئاێهمهیل بانانن
ئهول ئوردیبهههیشت ههر ساڵانا
له ئزرایل ئجازه سێنن
تاگهر چهوێگ بێهنه لهێرهوهرێانا
وڵام یهێ ڕووژ
له بانان سهرتاسێگ پێا بوون و
کهفن ئهو چووپی:
{له شوون ئی کهلیمهیل تۊهنین
دهنگ «عهزیز وهیسی»
یاگهر هاوار «تامازی لووتی» ئهژنووین }
ئمڕوو له سات سهراوهنۊنی
لهشێگ بهێدهم
ئڕاێ خهێاوانێگ
تا نقما بووم له شار
تا گیژ گیژ گیژ
منهی چهپگیگ درو
له گیرفان دکانهیل دهنگاتێ بکهم
لهش! لهش! لهش!
خهێاوان پڕه له لهشهیل وهیل
مهلۊچگهیل سیم سوو
تا ئێواره لهش ههڵچنن و
دارهیل دۊدی خوهن
م دهسم له گیرفان خهیاڵ ت چوه کهێ؟
چهوهیل هار نواترهک له لهش
لهش لۊهتهو کهن و هاوار کهن و
ئهنار فرووشن
یهکێگ گیرفانێگ
له پهنشهمه و ههفتشهمه چنۊد و
له داوڵهیل وهیل شار
بهش بهشهو کرد
م خهیالم م گیرفانم م گیانم پرۊ
له شهمهیل کهو کهو
له یهێشهمهیل تێژ
له دشهمهیل تیهت
{شمارهی تلیفوون چوارشهمه کی دیرێ !؟
یهکێگ تا بان ئهرگ ئهزرهت هاوار کرد }
****
کی ههڵسێ لهێ لهش جارانێه؟
وهیکانهیل باێهقوورهتهیل دهس فریشتهێ خیسیگن
گ له ماڵهکین ئهزهڵ
وه دزی ڕووژهیل سیارهو گیان دهر کردنه
لهشێان تام لاسیک ماشین خودا دهێ
ماشینهیل، ماشینهیل، ماشینهیل،
له چواردهڕێان واینا
لهش، لهش
وهرهو تیهریکی ڕێوار ههڵوژنن و
لهپ کوتن له نان دریژ و سیهێ بیاوانهیل
***
کی ههڵسێ لهێ لهش جارانێه؟
«کاوه» ههێمان خهیاڵ کهێد و
لهشهیل
ههێمان تام تیهڵ خفتوو دهن و
م ههێمان له شهقامهیل وهیل
سهرسم بهم و
دنیا ههێمان
دار شکنید و
دار ههێمان
منهی تهنافهیل وهیل کهید و
«ئهینهلقوزات»
تام ههمهدان و دار و «شهم ئاژن» دهید و
له «درسیم»
وهفرینهگان و ڕووبارهگان، ئهوڵ جههانا جیاوازن و
یهکێگ له بان تاشهگانهو چڕێ :
هاهاهاهاێ داوڵهیل بانان!
کی ههڵسێ لهێ لهش جارانێه؟
کی ئهوهڵ سێف وه هارانێه؟
کی تیهنێه باێدنه وهر ههر که ههس
گیان ڕچ ڕچ گرتمسه بان دهس!
مهی مهکهن ئاگر، م له ئاگر پڕم
چیو ههڵهتهلیم له گهناسر پڕم
تووژ تهم تهرم ت ها شانمهو
عهتر سیهێ داخ ت ها گیانمهو
سهرده! ههڵس دهروهچ زمسان بوهس!
لهێ نهفهسه تهمتهمهلۊلان بوهس!
لهێره ئهگهر قاڵ نهکهی وا تیهێ
ههم دهنگ دڵشێون هۊها تیهێ
لهێره هناس کهسێ ئاگر گرێ
لهی وهره یاس کهسێ ئاگر گرێ
داس وه دهس، شهو سیهگان هم چڕن:
لهێ وهره ههم باڵ مهلۊچگ بڕن...