
یاران مِزگـونا دنگ وهـارَه مـای
نوروزخان وَه فتحِ روزگاره مای
وزیران ئَر پِیش کلاولاره مـای
ئَه گردِ زمسون وَه پیکاره مای
ناجی ئِه طـرفِ کـردگـاره مـای
پِی خوشی خلق دلخمباره مای
پاش وَه رکاو اسب بی اوساره مای
گذر گـاش پِر ئِـه گـل گلزاره مـای
سازِنَش وَه ساز نیماواره مای
بازِنَش وه ناز لـکی داره مـای
نغمِه مَلانِش ئِه نـساره مـای
سِپای گُلانش وه هزاره مای
یاران مزگـونا دنـگ وهـاره مـای
نوروزخان وه فتح روزگاره مای
🌸🌸🌸🌸🌸🌸🌸🌸🌸
هاوا پِر ژَه کِیف وهارانه مای
بو طِیبِ طبلِه عطارانــه مای
تافه تاف تیژاو کوهسارانه مای
صِداش چو نَوای هَزارانـه مـای
فصلِ شوق و ذوقِ وَشیارانه مای
بادِه بی منتِ هـوشـیـارانـه مـای
هُور ئَر دیگَه بورِ ایـوارانـه مای
حکیم پِی درمان بیمارانه مـای
روژِ ئـِه دَر دایـنِ شـامـارانه مـای
مهره شان وَه گیر تول دارانه مای
وخت ویر کردن ئِه سردارانه مای
وَه یـادان اسـِر چو وارانـه مـای
یاران مزگونا دنگ وهاره مـای
نوروزخان وه فتح روزگار مای
🌸🌸🌸🌸🌸🌸🌸🌸🌸
هوفِـه کله باد ژَه دروَنـه مـای
نجات زمینِ قلف و بَنَـه مـای
آخرگال زمسون ئِه سر دَنه مای
تیر حق ئَر سینِه اهریمَنه مـای
شنیار خَمان دس وه شَنه مـای
چو روسمِ سر ئِه دیو سَنه مای
مرخِ گیون وَ شوق نغمه خُونه مای
وارونِ کـِرَم ئَـر گُـشـوَنـه مـای
بیستون وَه فر دِت اَرمنه مای
یادِش ئِه فرهادِ کوه کنه مای
داری دردِ ئی روزگار گَنه مای
فصل شادابی و خَنَ خَنه مای
یاران مزگـونا دنـگ وهـاره مـای
نوروزخان وه فتح روزگاره مای
🌸🌸🌸🌸🌸🌸🌸🌸🌸
فصل سور سما و ساز آوازه مای
شادی طنازان پِر ژَه نـازه مـای
گَل گَل طیوران وَه پروازه مای
شاقه شاق کوگ ؛سیسه بازَه مای
طریق اژ طِیِش در اعجازه مای
لاله بی شرم و یَخَه وازه مـای
مَقامَل لکی ئَر دنگ سازه مای
روح ژِی حالاته در پروازه مای
وختِ دیدار دوس هُمرازه مای
مایِه نشاطِ گیون بی آزَه مای
شُکرِ یزدان وَش پِر نیازه مای
ئَر دریانه دوس وَه نمازه مای
یـاران مزگـونا دنـگ وهـاره مای
نوروزخان وه فتح روزگاره مای
🌸🌸🌸🌸🌸🌸🌸🌸🌸
رسم قومُ خویشی هم ئِه نووَه مای
موسـم دَم تَـقـه و گفتگــووَه مـای
شـِوه دایـالـه و چـلسـرووه مـای
روژِ شـِلـکینه و نان و دووَه مای
خـیـر و بـرکـت وه کوکـووَه مای
مَشکه ئَر مالار هـرازگـووَه مـای
لطف یزدان ئَر کوه تا رووَه مـای
وه دادِ زاگرسِ بی چُرووه مـای
نه مِرخَزاران گل بی شووَه مای
بلبل هورَه چِر ئَر لِیو جووَه مای
پرویز پِی کلتان دواگووَه مـای
بـمارکـتان بو سـالِ نـووَه مـای
یـاران مزگـونـا دنـگ وهاره مـای
نوروزخان وه فتح روزگاره مای
🌸🌸🌸🌸🌸🌸🌸🌸🌸
پرویز مریدیان
پیردوستی