The Invite
"دعوت "منیم اوچون خیانت و یا جنسی ایسته‌کلردن چوخ، بیر زامانلار بیر-بیرینه عاشیق اولموش آدام‌لارین موناسیبتلرینده زامانلا یارانان اوزاقلیق و بیگانه‌لیکدن دانیشان بیر فیلم‌دیر.
فیلم ائله باشلانغیجا عشقی و ائولنمه‌نی قارشی-قارشییا قویان بیر نقل قول ایله باشلایییر. سانکی دئمک ایستییر، عشق ایده‌آل بیر موناسیبت اولاراق قالدیغی موددتجه گؤزلدیر، اما ائولنمه‌‌کله بیرلیکده عادت، گونده‌لیک حیات و مسئولیت‌لر انسانی عشقین حقیقتی ایله اوز-اوزه قویور.
اما منجه، فیلم باشلانغیجداکی بو فیکرین اوستونده یئترینجه دایانمیر. تاماشاچی گؤزله‌ییر کی، هَمین نقل قول فیلمین اساس خطینه چئوریلسین و ائولنمه‌نین عشقی نئجه سویوتدوغونو، اونو نئجه بیر عادت و بیگانلیگه چئویردیگینی داها درین گؤسترسین. اما سناریو داها چوخ ایکی جوتلوگون موناسیبتلرینده‌کی مختلف دوروملارا و اونلارین آراسینداکی مورکبلیک‌لره یؤنه‌لیر. بونا گؤره ده منجه، فیلمین باشلانغیجینداکی فیکیر فیلمین سون نتیجه‌سیندن داها گوجلودور.
بونلارا باخمایاراق، سناری موناسیبتلرده‌کی سویوقلوغو گؤسترمکده یئترینجه اوغورلودور. سورون ساده‌جه جنسی ایسته‌یین آزالماسی دییل؛ مسئله داها درین‌دیر. انسان‌لارین بیر-بیری ایله دانیشا بیلمه‌مه‌سی، اؤز ایسته‌کلری و ناراضیلیقلاری ایله صمیمی شکلده اوز-اوزه گلمه‌مه‌سی‌دیر.
ایکی جوتون بیر-بیرینین حیات یولداشی ایله جنسی موناسیبت قورماغا یاخینلاشدیغی صحنه ده بو باخیمدان ماراقلی‌دیر. ایلک باخیشدا بو حادثه بیرآز غریبه، حتی لازیمسیز گؤرونه بیلر. اما بونو بیر نوع سیناق کیمی ده قبول ائتمک اولار: مشکل پارتنرده دیر، یوخسا موناسیبتین اؤزونده؟ فیلم گؤستریر کی، پارتنری دییشمک بئله مشکل‌لری مطلق چؤزمور.
فیلمین رجیسورلوغو ایسه منیم اوچون اونون ان گوجلو طرفلریندن بیری‌دیر. قاب قورولوشلاری چوخ دقیق و دوشونولموشدور. کامئرا پرسوناژلاری عینی قابدا، حتی بیر-بیرینین یانیندا اولدوغو زامان بئله، اونلارین آراسینداکی عاطفی مسافه‌نی و بیگانلیگی گؤسترمکده باشاریلی‌دیر. فیلمین ویزوال اتمسفری ده سناری‌یه یاردیم ائدیر و بو سویوقلوغو داها گوجلو حس ائتدیریر.
اویونچولارین اویونو دا فیلمین گوجلو طرفلریندن‌دیر. پنه‌لوپه کروز و ادوارد نورتون هر ایکی‌سی چوخ یاخشی اوینایییرلار. فیلمین رجیسورو اولان قادین آکتریسا‌نین اؤز رولونداکی پرفورمانسی دا اوغورلودور و اونون اویونو فیلمین عمومی سَوییه‌سینه ضرر وئرمیر. کمدی آکتورو اولان دیگَر آکتورون پرفورمانسی‌دا عمومی اولاراق چوخ یاخشی‌دیر.
سوندا The Invite منیم اوچون ماراقلی فیکیری اولان و بو فیکیرلری یاخشی آکتور اویونو، اوغورلو قاب قورولوشلاری و گوجلو اتمسفر بیرلشدیرن بیر فیلم‌دیر. اما منجه، رجیسورفیلمین ایلکینده وئریلن نقل قول‌دان داها درین استفاده ائده بیلردی و بوتون حکایه‌‌نی عشق، ائولنمه و حس‌لرین زامانلا سویوماسی آراسینداکی موناسیبت اوستونده داها چوخ قورا بیلردی.
فیلم چوخ ساده، اما ماراقلی بیر حقیقتی گؤسترمکده اوغورلودور: موناسیبتده زامانلا بیتن شئی همیشه سئوگی اولمور؛ بعضا قارشیسینداکینی گؤرمک، ایسته‌مک و حقیقتن آنلاماق قابلیتی دیر.
