
«معلملر اوتاغی» فیلمی، ایلکر چاتاکین قورولوشوندا، تامامیله گوندهلیک بیر وضعیتدن باشلاییر، آما چوخ کئچمهدن جامعهنین دقیق بیر تمثیلینه چئوریلیر. مکتبده باش وئرن خیردا اوغورلوقلار، محاکمه مکانیزمینی، قورخونو و اعتمادین داغیلماسینی گؤسترمهک اوچون صرف بیر بهانهدیر؛ اله بیر یئر کی، حقیقت کشف اولونمور، یئنیدن قورولور.
فیلمی فرقلندیرن اساس جهتی اونون طرفسیز، آما ایتی باخیشیدیر. ایدهآلیست معلم کارلا نواک عادل اولماق ایستهییر، لاکین اله بیر سیستمین ایچینه دوشور کی، اورادا فردی اخلاق جمعی منطیقه قوربان وئریلیر. چاتاک اینجهلیکله گؤستریر کی، خوش نیت نئجه آسانلیقلا یومشاق و قانونی زوراکیلیغا چئوریله بیلیر.
فیلمین موسیقیسی آچار رول اویناییر؛ اونون عصبی ریتمی سانکی حکایهنین گیزلی نَبضیدیر. و عادی مکتب درامینی پسیکولوژیک تریلره چئویریر. دار کادرلار، اوزانان سؤکوتلار و موسیقی بیرلیکده اله بیر فضا یارادیر کی، گرگینلیک گؤرونمور، حس اولونور.
فیلم بوگونکو اروپانی تصویر ائتسه ده، بیزیم اوچون داها درین معنا داشییر. اورادا ائله بیر توپلوم گؤروروک کی، دیالوگ و قانون هله ده بحرانی حل ائتمک امکانینا مالیکدیر؛ بیزدن ایللرله اوزاقدا اولان بیر دوروم. ائله فیلمین گوجو ده بورادادیر: تماشاچی ایکی دونیا آراسیندا قالیر اورانین کؤورهک نظمی و بورانین تانیش آشوبو.
فیلمین آچیق سونلوغو دا عینی منطقین داوامیدیر؛ مطلق حقیقت یوخدور، یالنیز قازانان و قازانمایان یارادان حکایهلر وار. «معلملر اوتاغی» بیر اوغورلوق حاققیندا دییل، عدالت دیلینین مغلوبیتی حاققیندادیر؛ دقیق، ادعاسیز و سون درجه معاصر بیر فیلم.